#مشاهير العالم
لاما عزت 5 نوفمبر 2011
روح الوطن سلطان عقبه فقدنا الروح
ياحظ الثـرى اللي فيك بوجود سلطانه
ياسلطان رف بقلوبنا اللي جداها النوح
يابوخالد انت اكثر بشـر يخفي احسانه
أبنخاك وانت ان قيل تكفى تشيل صروح
طلبتك .. ذبحنا فقـدك المر واحـزانه
تعال ولك من عيوننا اللي تبي مسموح
ولاهو اعتراض أستـغفر الله سبحـانه
ياذابح سبب من غـاب ننساه يامذبوح
مهوب انت اللي من غيبته صار فقدانه
سأل عنك صبحٍ شوفتك صدره المشروح
وسأل عنك ليـلٍ وحشته منك سهرانه
وسأل عنك طفلٍ قال احبك بكل وضـوح
وسأل عنك من فيك ألتقى اهله وخلانه
وسأل عنك من حده زمانه وهو مجروح
وسأل عنك هالعالـم والاسـلام وآذانه
وسأل عنك صدقات الخفا وما كتب باللوح
وسأل عنك ذودك والوسم هو وهتانه
وفقدك الكـرم والخيل والخير والمدموح
فقدك الوفـا يابوي والشعب بالوانـه
فقدك القنص والطير والهـد والمطروح
فقدك الدفـاع وقوة الجيش واركانـه
فقدك الجميع ولافتقدناك فعل و ضـوح
وصلناك ود ولك مكـان اعتلى شـانه
يابوي وكمال المرجله يابعيـد الشـوح
ملكت القلـوب ابملكك قلـوب شفقانه
يامن بالشبه تشبه لمن جاك رفقة نوح
بوقفتـك هونت وهجـد قو طوفـانـه
ولا يمكن أبْدن ما بنيته يابوي يـروح
من المستحيـل نهـد ونهجـر بنيانـه
بنبقى على عهدك ووعدك فرح وتروح
وعلى الله نوفّي بعض ماقمت في شانـه
ولو قلت مهما قلت كل المعاني فـوح
زكـا سيرتك يـاسيدي فيـك برهانـه
تغيـربك التـاريخ والربح والمربـوح
وتغيربك الأحـوال والفـال وازمـانه
وتغيربك الساكن بحر .. بر والا سفـوح
وترا المملكـه ياسيدي منك مندانـه
تباشير بسمة ضحكتك سر.. زهر الدوح
عطت من يشوفك بالأمل والوفـا خانه
يقول المثـل لا بين الله غلا .. والبوح
هو اللي حصل فينـا واحاسيسـنا بانه
كأن الحزن والدمـع له بابنـا مفتـوح
ومن رحت كن الضيق بصدورنـا أمآنه
ذهـول وغدينا كلنا صوتنـا مبحوح
وعلى كـل وجه تشـوف الآمال حيرانه
أواسي من يواسي وقلب العنا مسطوح
واعزي من يعزي وانا النفس بحلانـه
عيـوني تخفّي من بلاها كثير جـروح
وجعهـا مهو خافي بزفـرات مليـانه
سترت الونين وصار حالي هو المفضوح
أقـابل مصافحني فبسمـات ذبلـانه
انا بين نـارين اكتـم الحـزن والا ابوح
وبالحالتين الحـال حـاله وتعبانـه
يارب المـلا لطفـك بسلطاننـا الممدوح
ياربي دعيتـك ترزقه عـالي جنانـه
وياجعله من اللي يعبرون السراط جموح
بلمح البصـر يعبره والنفس رضيـانه
ياسلطان من عقبـك وطنـا فقدله روح
وقلبـه توقف نبض وانسـد شريانـه
'فيصل بن خالد بن سلطان بن عبدالعزيز'
